avyāhataṃ
Śabdakalpadruma
☞
vol. 1,
p. 136.
avyāhataṃ , tri, (na vyāhatam . nañtatpuruṣaḥ .)
vyāghātaśūnyaṃ . yathā .
“yasya trikālamamalaṃ jñānamavyāhataṃ sadā .
vetti vidyāmavidyāñca sa vācyo bhagavāniti” ..
iti śabdamālā .. kiñca . viṣṇupurāṇam .
“annaṃ balāya me bhūmerapāmagnyanilasya ca .
bhavatvetat pariṇatau mamāstvavyāhataṃ sukham ..
prāṇāpānasamānānāmudānavyānayostathā .
annaṃ tuṣṭikarañcāstu mamāstvavyāhataṃ sukham” ..
ityāhṇikācāratattvam .. (akuṇṭhitaṃ . yathā, —
“vedaśāstrārthavijñāne yeṣāmavyāhatā matiḥ” .
iti mārkaṇḍeyapurāṇe .)