aśūnyaśayanavrataṃ

aśūnyaśayanavrataṃ , klī, (na śūnyaṃ śayanaṃ yasmāt, tat
vratam .) śrāvaṇakṛṣṇadvitīyākarttavyavrataviśeṣaḥ .
yathā, —
“brahmovāca .
bhagavan ! puruṣasyeha striyāśca virahādikaṃ .
śoka-vyādhi-bhayaṃ duḥkhaṃ na bhavedyena tadvada ..
bhagavānuvāca .
śrāvaṇasya dvitīyāyāṃ kṛṣṇāyāṃ madhusūdanaḥ .
kṣīrārṇave salakṣmīkaḥ sadā vasati keśavaḥ ..
tasyāṃ saṃpūjya govindaṃ sarvvān kāmān samaśnute .
go-bhū-hiraṇya-dānādi saptakalpaśatānugaṃ ..
aśūnyaśayanā nāma dvitīyā yā prakīrttitā .
tasyāṃ sampūjayedviṣṇumebhirmmantrairvvidhānataḥ ..
śrīvatsadhārin śrīkānta śrīdhāma śrīpate'vyaya .
gārhasthaṃ mā praṇāśaṃ me yātu dharmmārthakāmada ..
agnayo mā praṇaśyantu devatāḥ puruṣottama .
pitaro mā praṇaśyantu matto dāmpatyabhedataḥ ..
lakṣmyā viyujyate devo na kadācit yathā bhavān .
tathā kalatrasambandho deva mā me viyujyatu ..
lakṣmyā na śūnyaṃ varada yathā te śayanaṃ sadā .
śayyā mamāpyaśūnyāstu tathaiva madhusūdana ..
gītavāditranirghoṣaṃ devasyāgre tu kārayet .
ghaṇṭā bhavedaśaktasya sarvvavādyamayī yataḥ ..
evaṃ sampūjya govindamaśnīyāttailavarjjitaṃ .
naktamakṣāralavaṇaṃ yāvattatsyāccatuṣṭayaṃ ..
tataḥ prabhāte saṃjāte lakṣmīpatisamanvitāṃ .
dīpānnabhājanairyuktāṃ śayyāṃ dadyādvilakṣaṇāṃ ..
pādukopānahacchatracāmarāsanasaṃyutāṃ .
abhīṣṭopaskarairyuktāṃ śuklapuṣpāmbarāvṛtāṃ ..
sopadhānakaviśrāmāṃ phalairnānāvidhairyutāṃ .
tathābharaṇadhānyaiśca yathāśaktyā samanvitāṃ ..
avyaṅgāṅgāya viprāya vaiṣṇavāya kuṭumbine .
dātavyā vedaviduṣe na vakavratine kvacit ..
tatropaveśya dāmpatyamalaṃkṛtya vidhānataḥ .
patnyāstu bhājanaṃ dadyāt bhakṣyabhojyasamanvitaṃ .
brāhmaṇasyāpi sauvarṇīmupaskarasamanvitāṃ .
pratimāṃ devadevasya sodakumbhāṃ nivedayet ..
evaṃ yastu pumān kuryyādaśūnyaśayanaṃ hareḥ .
vittaśāṭhyena rahito nārāyaṇaparāyaṇaḥ ..
na tasya patnyā virahaḥ kadācidapi jāyate .
nārī cāvidhavā brahman yāvaccandrārkatārakaṃ ..
na virūpaṃ na śokārttaṃ dāmpatyaṃ jāyate kvacit .
na puttrapaśuratnāni kṣayaṃ yānti pitāmaha ..
saptakalpasahasrāṇi saptakalpaśatāni ca .
kurvvannaśūnyaśayanaṃ viṣṇuloke mahīyate” ..
iti matsyapurāṇe aśūnyaśayanavrataṃ 67 adhyāyaḥ ..